أبو مصطفى:
أفكارنا بفحوى حديثك برجو عرفو النتيجه وللنتيجه تدرجو
غزلان بسهول الغناني تكرجو وأسود عجبال المعاني عرجو
في ناس عسهل وجبل يتفرجو ت ضل بالقمه عليي حرجو
لوما القمه تخاف دعسة أبجري ما كنت بسهول البسيطه بهرجو
أبو علي:
لولا حصن خيبر بعثلي مراحبو قلي علي للخيبري لا تصاحبو
يا بو مهر بلجام خوفك ساحبو دمع الوهم جفنك عجفنك ناحبو
جرد الجبل عالي ما فيك تراحبو إنكنك بسهل شعيب وجك شاحبو
بخلي السهل يطوي مثل وادي طوى لبس نعال المهر جبهة صاحبو
أبو مصطفى:
مهر الذكا مطعميه من فكري سبل يدعس بجبهة صاحبو حكيك هبل
بالشين شين شعيب زهرو ما ذبل سهلك وسيع الكون من إسمو إنطبل
والميم إلنا محمد وموسى إنقبل مشيو سوى الأيمان قبلهم قبل
مفهوم شو إللي بخلعو بوادي طوى وفي ساعة إللي بريد بطلع عالجبل
أبو علي:
هلق بدي "صنين" عشعري يلين وعيون أرزتنا عليي مجوهرين
بحرفين ميم وشين لما بتستعين مش فارقه جيب الحروف الباقين
ميمك بمكه ميم مرفوع الجبين وموسى بحمى فلسطين في ثاني عرين
وبشين جدي شعيب جد المرسلين موسى رعى الغنمات سبع من السنين
وعطور سينا نور رب العالمين وعطور سينا الشعر زين العابدين
معمرلكم برطاش في وادي طوى تتخلعو مطرح أجل السامعين
أبو مصطفى:
بلش يزق لسانك بخفه وكرج هيك الجمل من طولة شفافو عرج
ميمي محمد فوق معراجو عرج وبالميم موسى مهر للتقوى سرج
مش إنت زين العابدين اللي خرج من بيت مكه وللوفا نبعو درج
تتصير أصل وفعل عالله الفرج وبتعمر البرطاش في سوق الحرج
لو طاش عالبرطاش سبع المرجلي ما بدنس ركابي ولا بدعس عالدرج
أبو علي:
عسيرة التزويد يا كوكب هوى نحنا الخلقنا الجرحى ووجدنا الدوى
ما جبتك لوادي طوى تشم الهوى تتمرجل على السبع يا سبع القوى
جبتك بعد ما مات موسى وإنطوى ترعى غنمنا واللوى يرفع لوى
والسبع للراعي الضروره ما نوى الراعي عدو الذيب لو صوتو دوى
لا تخاف لو عالدرج دمك درج مع شخص مشى الذيب والنعجه سوى
ألسيد مصطفى:
موسى رعي الغنمات من عقلو الذكي منو شعبيك صب دره بمسبكي
شو باك عم بتطهوج بكثر الحكي براعي وأسد والذيب شله مشربكي
من الانبيا تخلص بفن وفزلكي مشيلك عشئ موضوع حاجي حيلكي
شو وصلك للذيب حتى تشتكي شكوى النعاج ال بالبراري ملبكي
بتحب تأخذ من دماها وتنتكي يما تردو في شهامه مباركي
بين الأخذ والرد إفتح جبهتين تنشوف أي حرب يربح معركي
زين شعيب:
نحنا مواضيع الشعر منعدها لما رجال العبقريه نعدها
النعجه الوديعه للحرب لا تشدها ولا من مكارم زين يوقف ضدها
الدنيا إذا بتفتح عبابي يدها قدران أعطيها مثل ما بدها
الطاقه ال ما منها هوى منسدها بدنا فطاحل قدنا من قدها
ولما قوافي الشعر تأخذ حدها بين الأخذ والرد نفسك حدها
مع شخص الله لأخذ روحك باعثو وإن كنت قادر يا محمد ردها
محمد مصطفى:
بحمل الأخذ والرد بركنا الجمل ينهظ بحمل نقول ما شاءالله حمل
نقيت أخذ الروح والباري شمل بعنايتو إنسان أودع من حمل
في أنبياء صلاح أفراد وجمل ماتو وبقي القديس ذكرو ما إنهمل
موكل عأخذ الروح والوعد إكتمل معليش خذها في معي فسحة أمل
رديتها ترفرف عدار الأخرة تلاقي عملها والأمل قد العمل
زين شعيب:
عالأخره روحك نقل محصولها شو همني من طلوعها ونزولها
بإيدي أنا عرض الحياة وطولها بتأخذ بتعطي فصولها من فصولها
الدنيا على حرفين مال ميولها الأسمين خلقو زينها وزغلولها
وهالمعركه دوري دخل منزولها عجزان جولات النسور يجولها
نحنا ال أخذنا الريح من أيلولها اللي شلح غصون الكرم مريولها
وحرية الأمة ظهر مفعولها تؤخذ ولا تعطى بشرع إصولها
وإن كنت جايي تردنا للإنتداب إقطع لسانك من قبل ما تقولها
أبو مصطفى:
مش كل حريه لها عصر الفريد خذها بإيد بردها من غير إيد
حرية ال بتحكم السيد بعبيد رديتها ورديت للجندي العقيد
وحرية النسوان إلنا ما تفيد رديتها في سيف يقطع بالوريد
وهلق إذا بتأخذ معي ضربة رجيد بردك مفكفك مثل رمعون الوقيد
وكل دوله معتديه من جديد عحدود أرزتنا ولبنان الوحيد
مليون كيلو متر بدي ردها في صوت مثل الرعد يقطع بالحديد
أبو علي:
يا إم كلثوم إسهري عأوتارنا حتى نبيض ليلنا بنهارنا
لما الأرانب يدخلو عأوكارنا منقلهم هالكار منو كارنا
نادو عأخذ الثأر يا أنصارنا الأرضين إلنا والديار ديارنا
مصر وسوريا أهلنا وجوارنا إن جار الدهر مش حق ننسى جارنا
من روسيا لوما أخذنا عيارنا صواريخ سام السم رش بذارنا
وبمصر كانو بحورنا وأنهارنا البابين مقفولين عأسرارنا
لوما أخذنا ثأرنا من الأجنبي كنا بقينا تحت وصمة عارنا
السيد:
قصة "أرينب " ما عرفت عنها يشيع أخبار لما ردها العقل الضليع
مضبوظ بصواريخنا ذاع المذيع من روسيا كان الأخذ إلنا شفيع
لما أميركا هيجت رأئ الجميع تأخذ من البترول شو ما بتستطيع
لوما نرد الأخذ بالرأئ البديع ما ربحنا المعركه وصارو قطيع
خلي الدول وجيوشها وحرب الفظيع بعطيك معنى يشيب الطفل الرضيع
هالصاعقه ال نزلت من الجو الرفيع برعده أخذها الكون بالخوف المريع
لوما يجيها من السما أمر السريع ويردها نص البشر منها يضيع
لوما إجا نوار عنصرتو يبيع من حرها اللي يبست كل الربيع
لوما حلم الله يرد العاصفه نسمة بروده تشعل الكون الوسيع
زين:
من هيك رده مخنفسي ومنطفسي ضيعت حالك يا إله المحبسي
يا سيد من الخمر لازم تحتسي منشان إفرق محبسك عن محبسي
كنت إفتكرتك راهب بهالمحبسي تاري لقيتك لازمتلك مكنسي
لما أرينب زوجها عليها قسي ويزيد ناداها جنب مني إجلسي
لزما الحسين يحل عقده معربسي وبأخذها يرد الحياة المؤنسي
بقيت أرينب بالقلق والهودسي وتاكلت بالدم لقمه مغمسي
يا طير خذ الريش مني وإكتسي وإفرح بين النرجسي والنرجسي
يا أرض من ثوب الربيع السندسي منو خذي منديل أخضر وإلبسي
من مدرسي للعلم إحلى مأسسي منها بيأخذ واجباتو ال ما نسي
الطالب الكسلان مثل حكايتك برد كتب المدرسي للمدرسي
السيد:
لو شفت فكري بالمدارس ما إنشلم مش عن كسل قلبي ع الدرس إنكلم
خلق النبي أمي بدرسو ما إعتلم مثلو أنا بسلم وكفي ما إستلم
رديت علم الجهل ع عالم ظلم مني وفيي النور بشق الظلم
ومهما المدارس علمتني عالقلم ما إخذت منها ولا العلم منها إنسلم
رديت كتب المدرسي للمدرسي صدري كتاب الدهر ولساني قلم
أبو علي:
ضاع الولد يا شعر إوقف ع شفا تشوف في رجال عالمنبر لفا
زيت العلم ما زال قنديلو إنطفا بدماغ سيد هاشمي زين إكتفا
القرآن لو ما يندرس وجه وقفا إنكسرت قلام الدين والحبر إختفا
وحتى النبي طه الرسول المصطفى بتقول أمي كان يا غبن الوفا
ما كان أمي كان للامه صفا من وحي ربو يأخذ دروس الصفا
عهيك ردي قطع رأس بيلزمك حقرت جدك يا محمد مصطفى
السيد محمد:
لما الوحي آيات الله عدها طه حفظها ما بقلك صدها
معناتها مش مكتبه عن يدها تسلم كتب وقلام يحفظ ودها
فرق ما بين هزل المعاني وجدها من قبل ما المرسي بعنقك شدها
لما علي فرشة محمد مدها هجمة عداها ردها عحدها
كان الفساد والكفر قدو قدها وسيف الحقد والنقد حدو قدها
وهالفتنة ال هجمت عبيت العنكبوت دخلك إخذها الباب يما ردها
زين شعيب:
حاجي بغزلة عنكبوتك تستعين هيدي حكايه أكلت عليها السنين
وتردنا ألفين عام من مأخرين في عصر عالم للكواكب واصلين
يا حيدر الكرار يا حامي العرين بين الأخذ والرد فيك مأمنين
لو ما أخذت رابع خلافه عن يقين وقدران تأخذها بصفوف الأولين
وتردها كان ضاع مجد المسلمين وصفا اليمين شمال وشمالك يمين
كان ضل بو الحسنين إسمك يا علي وشعبك خسر كلمة أمير المؤمنين
السيد:
ضيعت غزلة عنكبوتي وإندلع منك لسان النار وبحكيك دلع
ورديت تحكي بالخلافه تنشلع قلبك بحب الأخذ أترك هالولع
لولا خلافة أربعه الثوب إنزلع ثوب الديانه إنباع بيعات السلع
وإفهم إذا فكرك عن الماضي إطلع بين الأخذ والرد مين دك القلع
شرواك موسى الأشعري الشجره قلع شجرة كروم الدين ت الحق إنبلع
لما أخذ كف اليمين من الشمال الخاتم خلع من خنصرو وحيدر خلع
زين:
هلق تعي يا نجمة الزهره إسهري مع فاطمه الزهرا وحسنها العسكري
وإن كان ما بتبكري بتبكري أيام سيد هالأجير بلا كري
يا جاهل التأريخ لو عقلك دري كان إنحنى جبينك عخشبة منبري
خاتم البيعه من صياغة جوهري تشوه عند ما سلمو للسنكري
وبوقتها كان الإمام الحيدري عارف بموسى الأشعري مخلص بري
لكن يا عمر العاص إنت المفتري لما دخل عالشام أول عسكري
بلشت في مكرك تبيع وتشتري ورفعت قرآنك عسن السمهري
وبخدعتك رديت جيش المسلمين وعاود علق فيها بو موسى الأشعري
السيد:
نادي تواريخ القديمه وقلها السيد محمد سيد على مطلها
بالأخذ قبل الرد إيدك بلها بالأشعري والعاص إمشي بظلها
وأخذ المصاحف قبل كفك تلها حتى الخديعه بنيتك توصلها
حتى العداله المحكمه تحتلها إحكم يا قاضي عالحقيقه دلها
عشاعر بيأخذ أمانه زلها شقعة مصاحف لا إستحى ولا جلها
ما أسرعو بأخذة أمانه مقدسه نصاب ما بردها لمحلها
زين:
يا سلام عهيك شاعر يا سلام مثل ال عم بيصرخ تفرج يا سلام
بعتب عللي سماك من نسل الأمام وإنت ماشي خلف مش ماشي أمام
كل ما الأمانه بتنذكر خلي الكلام موجه إلي بهيبه وخشوع وإحترام
لما بنى إبراهيم بيت الله الحرام حجار الحرم ما ردها لثاني مقام
لكن النار المحرقه عن إنتقام سيطر عليها وردها برد وسلام
أذكر السمؤال للامانه وروح نام ضحى بإبنو كرامة الناس الكرام
مثلو أنا لو أخذت ليره من عصام ما بردها لليلى وخديجه وأبتسام
تكون مثلك بستحي بين الأنام تفطر على اللحمات بترد العظام
صحرا بلا ناطور كرم بلا سياج ورزق سايب علم الناس الحرام
مصطفى:
إبراهيم عنو قلت يا عين المنى رد الحراره برد منسوبه لنا
صحرا بلا ناطور ما إلنا غنا عنها إنطرها إنت وتركني أنا
وحيث الأمانه أخذتها وكفك جنا ردها لأصحابها وشد البنا
أحسب السمؤال بحر طائف بالهنا طوفة أمانه وطرفك عليها رنا
وهالبحر الله خالقو وفيه إعتنا حاوط جميع الكون ع إي بنا
موجه تجي موجه تروح من دون قنا تأخذ هياج من بعضها بهدر وغنا
ولوما الجزر ما يرد مد مواجها كل يوم من طوفانها بيحصل فنا
شعيب:
جربت غني مع سيادي مدني تاري شفت حيط السياده هدني
يا حضرة المردود حاجي تحدني بخجل بهالعركه العرق لو كدني
رب السما الله عطاني ومدني و دقيت بابو للعطا ما صدني
رب السما بعزني وبودني ولما طلبت منو عطاني ومدني
ما شافني طمعان مثلك بالدني حتى إذا دقيت بابو يصدني
ولولا السما بحبالها بتشدني تفاخر وخاف للأنبيائك عدني
أرض الفنا أخذت نبي وما ردتو عالأرض ما بقبل سماها تردني
*********
موضوع: الزجل والزجالين...شعراء الزجل اللبناني الاصيل