منتدى بسمة أمل فلسطين
مرحب بزوار منتدانا الكرام ..يشرفنا ويسعدنا اختي واخي ان تسجل معنا ..تفيدنا مما وهبك الله من علم ومعرفه املين ان تفيدنا وتستفيد
اهلا ومرحبا بكم
المدير:
صابر الحاج محمود
اليامون


.
منتدى بسمة أمل فلسطين
مرحب بزوار منتدانا الكرام ..يشرفنا ويسعدنا اختي واخي ان تسجل معنا ..تفيدنا مما وهبك الله من علم ومعرفه املين ان تفيدنا وتستفيد
اهلا ومرحبا بكم
المدير:
صابر الحاج محمود
اليامون


.
منتدى بسمة أمل فلسطين
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتدى بسمة أمل فلسطين

تخليد ذكرى الشهداء- ادب - شعر - خواطر- تراث-احداث-تاريخ -مجتمع-ثقافه -ابداع-حكايات فلسطين حكايات عربيه.
 
الرئيسيةالبوابةأحدث الصورالتسجيلدخول

 

 الشيخ الويسي ( اللويسي ) / صابر عباهره ابو سامر / اليامون

اذهب الى الأسفل 
كاتب الموضوعرسالة
صابر عباهره
المدير العام
المدير العام
صابر عباهره


ذكر عدد الرسائل : 2011
الموقع : منتدى شهداء اليامون .. وكل فلسطين ..شهداء الحق من اجل الحريه
المزاج : صافي وذلك الفضل من الله
تاريخ التسجيل : 26/10/2008

الشيخ الويسي  ( اللويسي ) /  صابر عباهره ابو سامر / اليامون Empty
مُساهمةموضوع: الشيخ الويسي ( اللويسي ) / صابر عباهره ابو سامر / اليامون   الشيخ الويسي  ( اللويسي ) /  صابر عباهره ابو سامر / اليامون Emptyالأحد فبراير 08, 2009 8:40 am

هل الشيخ اللويسي شخصية حقيقية أو خيالية ، واقعية أو أسطورية ؟ سؤال قد يتبادر إلى ذهن القارىء ، وربّما لا يلقى جواباً وسط ما تثيره ـ مطوّلة سعود الأسدي الرائعة ـ كما وصفتها مجلة الآداب البيروتية كقصيدة فذة في الشعر الفلسطيني بامتياز . إنها رائعة حقاً بما امتزج فيها من عناصر الفن والإبداع بتفاصيل وتداعيات متوهّجة وصورباهرة من ربوع الوطن ، وهي قصيدة مركبة ليست مسطّحة وفقراتها أشبه بحركات متعدّدة في شخصياتها المتداخلة. كيف نسج الأسدي هذه القصيدة بظلالها الفلسطينية وبهذا التركيب الحداثي في الشعر الفلسطيني المعاصر ؟! لابأس يا سعود الأسدي تجعل من الحجر الذي أهمله البنّاؤون راساً للزاوية . وإذا صنع موسيقيّو الغرب من قصائد كبار الشعراء " القصيد السيمفوني " فإنّك باقتدار فائق جعلت من اللغة الفلسطينيه المحكية ، وأنت أستاذها وسيدها ، سيمفونية شعرية تشنّف آذان القاصي والداني . والقصيدة بمكوّانتا من مادة وروح ، وحس ووجدان وزهد وتصوّف تجعل من شخصيتها المحوريّة " الشيخ اللويسي " وليّاً من أولياء الوعي والإدراك والمحبة والصدق واستشعار الخطر والتنبؤ به . وكذلك من الشخصيات الثانوية شخصيات أليفة محببة ، فالحاجّة " حمدة " من قرية دورا الخليل في دفاعها المستميت عن الشيخ اللويسي ردّت كيد شائعات المتجنّين عليه من الرجال إلى نحورهم ، وهذا الردّ الأنثوي الرقيق والعميق والخصب بما فيه من أسرار حياتية جعل من جلافة الرجال وصلافة تعابيرهم أضحوكة .وأما( شيخ النَّوَر) فإنه حاز شرف الكلمة عندما قال : صحّ العرض مثل الأرض غالي لكن الروح أغلى !! وكذلك جدتك العظيمة " زليخا " ما هذه الجدة المرجعية ؟ فقد صفعت ضمناً فريقاَ كاملاً من الذين" اشتغلوا " بالسياسة في مكاتبهم ودكاكينهم وصالونات سمرهم ، ولم يكونوا يسمعون صوت اللويسي الجهير يجلجل صباح مساء معلناً " سياسته " الاستشعارية المتجمّعة بين جوانحه من مشاعرعامة الناس كما يتجمّع النور في حبة الألماس ، بل كانوا يهزأون به ويرون صاحبه " أخوث" وهم " عقلاء" حتى جاءت النكبة . فما أن زعق الزاعق حتى ركبوا سيارتهم الخصوصية ، ويمّموا شطر مصايف بيروت والشام . وأما جدّتك زليخا بترديدها " نبوءة الشيخ اللويسي" قد دعّمت صدق تلك النبوءة العاقلة القائلة بضياع الوطن برغم ما في ذلك التدعيم من رثاء يتشظّى مرارة مستبدّة دائمة ( كتفجير نووي متواصل ) لا تعادلها أيّ مرارة في الوجود !! واسمح لي أخيراً أن أقترح عليك أن تستبدل العنوان أعلاه بعنوان " نبوءة ضياع فلسطين " كما سبق وتنبّأت بضياع العالم العربي بقصيدتك التي سبق ونشرتها تحت العنوان " نبوءة التيه الأخير" أو ( قصيدة من قاع الدّست ) ومطلعها : قتلتني تلك العيون السّواهي بالذي تحت سهوها من دواهي بإخلاص ح. عبدالله الشيخ اللويسي كانْ ،

وِالناسْ في حيفا وْقضاها بِعْرَفوه ،

درويشْ عابابَ الله كل يوم يْشوفوه ،

بْلفـِّه وْثوب مْرقَّع وْجِبِّه ،

وِالوَسَخ خُمْل الكَفّ عَ القبِّه ،

وْمِسْبَحَةْ يُسْر بْرَقْبَتُو ،

حَبّاتْها سُوْد بْعَدَدْ

أسماءْ مَوْلانا الصَّمَدْ .

وِبْإيدو مُحْجانِه

وِجْيابو خُبْز وْتمِرْ مَلْيانِه ،

ماشي حَفَا بْحيفا ،

بْلحظَه يكونْ عَ الشَّطّ

عِند بَـبُّور القُطُنْ ،

وْبَعِد لحظه تشوفو في المينا ،

وبعد لحظه مثل طير يْطِيرْ

مْن السّعادِة لَلعزيزيِّه ،

وْمن عمودْ فيصلْ

لَلجّرينِه وْسَاحْة الحناطيرْ ..

**

وِالناسْ كانوا يِسْمعوه

وْيِحْكُوا مَعُو وِيْمازْحُوه

وِالبعضْ كانوا يْزَوّدوها وْيِزِعْلُوه

تايصيرْ يُهْدُر هَدِرْ وِيْردِّدْ:

" هِدِمْ دِدِمْ دِلِم يِلِمْ أفَنْدِمْ "

…وْبالأخير يِخْتِمْ :

" يِلْعَنْ أبو الْ يِحْكي

وأبو الْ ما يِحْكي " .

*** وْمِنْ كُثُرْ ما الشيخ اللويسي كانْ

سايح بْحُبّ الله

إلناسْ قالوا عَنُّو : إنّو كانْ وَلِي

يْكاشِفْ وِيِتْباصَرْ .

*** في مَرّه قائدْ إنجليزي حَقَّرو ،

رَدّ اللويسي عليه : الله يِلْعَنَكْ ،

نِيْع الإِنِجْليزي بَعِد سيعَه التَوَقْ ،

رِجِعْ ثاني يومْ يِسْتَخْطي ،

وْباسْ إيد اللويسي وِتْرَجَّاهْ ،

قام اللويسي أخَذْ فَرْدِةْ كُنْدَرَه

وْضَرَبْ نِيْع الإنجليزي صَحَّحُو !

*** وِالناسْ ما نِسْيُوا لحدّ اليومْ

يومٍ كَشَفْ في حيفا عن حَيِّه

مْقَرّصَه بْلَبَنَاتْ فلاّحَه

جايي تْبيعِ اللَبَنْ في السّاحَه

ساحْة الحناطير ،

وهي الحُرْمِه خاطْمِه جَنْبو

وْحامْلِه دِسْتِ اللبنْ عاراسْها

قَلْلا: اسْـتَـنِّي شْوَيّ ياحُرْمِه

وْقام الرّجُلْ عَالفورْ

هيكي ،

وْأخَذْ دِسٍت اللبن عن راسْها

وْلا شور وْلا دستورْ

كُبْ ،كَبِّ اللبنْ في الساحَه

ساح اللبنْ أصفرْ بلون السّمّ

وْقَبِلْ ما الحيّه تخشّ الحَيّ

وِتْبَلِّش تْفاعي ،

اللويسي شِرِبْ جُغْمِة مَيّ

وِتْعَوَّذ وْسمّى وْنَدَهْ :

يَلاّ يارْفاعي !

وْراحْ داشِعْ دوزْ عَ الحيِّه

وْنادَى عليها : وينْ يا سَعْدَى!

جالِكْ أبو جَعْدَه ،

يِعْمَلِّكِ زْيارَه ،

وِيْرَقِّصِكْ عَ الدّفّ والطّارَة ،

إرْجَعِي من الحارَه !

وِالحيِّه رِجْعَتلُو بْإشارِةْ إصْبَعو

وْزَحْفَتْ لَعند اجْريه وْرَفْعَتْ راسْها

هَدّ وْلَقَطْها وْلَكّها عارَقْبِتو

حَيِّه جَدْرَا طُوْلْ غَمَّارَه !

والناسْ لمّا شافوا هَالشّوفِه

البَعْضْ ياخوفي !

راحُوا فَلِيْخَا ، والبَعِضْ قالوا :

هذا الشخِص مبروكْ ،

فيهْ سِرّ من ألله !!

وِالحُرْمِه أخْذَتْ إيْدوا باسَتْها

ولما رَمَى لْها الحَيِّه داسَتْها

وْشَكْرَتو وْقالتْ :

سلّمتني يا شيخْ ألله يْسلّمَكْ !

وِبْجاه سِيْدي الخَضِر ألله يْكرّمَكْ !

*** وِحْكايْةِ الحيِّه انْتَشْرَتْ في البَلَدْ

وِالناسْ من كَهْل وْوَلَدْ

قالوا الشيخ اللويسي سِرّو كْبيرْ

*** وِحْكاية مْبارِحْ

لماّ بَقَا بأرْض الوَعَرْ سارِحْ

بِكلْمِه مِنُّو طالْ طِفْل زْغيرْ

لما وِقِعْ في بيرْ (بِالكبابيرْ )!!

*** وْبَعِدْها بجُمْعَه

وِالناسْ يوم العيدْ مِجْتِمْعَه

فَجْأه أجَالُو هادِس وْقَلْلو :

يا حيفْ يا لْويسي !

تْعَيِّد بْحيفا هونْ لحالَكْ

وِالعيدْ يِهْنالَكْ؟!

وِامَّكْ بيوم العيدْ جوعانِه

وِثْيابْها خُلْقانْ بَليانِه ؟!

بَقَى ليشْ ناسِيْها ؟

وْأيش سَوَّتْ تا تْجَافيها ؟!

فِزّ يلاّ قُوْمْ !

رُوْح طَعْميها وإكْسِيْها !

*** وإمّ اللويسي ساكْنِه بْأرْض (اليَمُونْ)

بِحْذا (جِنينْ) غَرْبا ،

وْما خَفَاك الحالْ ،

إللويسي قالْ :

ياحَيّ يا قَيّـوم !

تَنِّي أقُوْمْ ،

وْراحْ يُرْكُضْ من شْكْل مجنونْ !!

وْمن قَبِلْ ما تْصُبّ كاسِةْ شاي

وِتْحَرّكو وِتْلِفّ سيجارَه

وْتِسْحَبْ عليها نَفَس وِالثاني

كانْ صار مْوَدّي لإمُّو

طَرْحَه من خبز الطَّبـُونْ

من عند عَمْتو في(الدّمُونْ)

وِصْلَت وهي ْ سُخْنِه تْهَبِّلْ عَ اليَمُونْ

ودوزْ دُغْري على (الخَمّاراتْ )

راحْ للخيّاطْ ( جَبْرا ) وْفَاصَلُو ،

وْفَصَّلْ لإمّو عَ المَحَلّ شَنْتَه

وْقَبِل ما يْصَلُّوا صلاة العيدْ

وِيْعايْدُو: وْكُل عام وِانتو بخيرْ

وِصْلَت وهيْ مَطْوِيِّه بالشَّنْتَه ؟! *** وْلما حُرْمِه تُقْعُد تْقاسِي

وْطَلْقْها يُبْرُدْ

وِالجْيابِه مَعْها تِتْعَسَّرْ

كانوا يْقُولوا نادُوا عَ اللويسي

وْلما كانْ يُحْضُرْ

وِيْطُولْ مِسْبَحْتو ،

وْيِقْرَا وِيْعَزِّمْ ،

وِيْبَلِّش يْتَمْتِمْ ،

في الحالْ كانْ طَلْقِ المَرَا يِحْمَى

وِالجْيابِه مَعْها تِتْيَسَّرْ

وْبعد لحظَه الحُرْمِه تِتْبَشَّرْ

مِنِ الدّايِه بالبِنِتْ أو بالصَّبِي

قَبِلْ ما يِخْتِِمْ صَلاتُو عَ النّبِي !!

*** وِالناسْ قالوا في بَعِضْ مَرّاتْ

شيخ اللويسي كانْ لُو شَطْحَاتْ

وِبْإذِنْ ألله كانْ ،

يِرْكَب بْساط الرّيحْ

وبِْكلّ فَجْر يْطيرْ عا مَكِّه

يتِْوَضّا من زمزمْ

وِيْصَلِّي في الكعبِه

وقبل ما يْفِجّ النهارْ

وِتْبَلِّش العتمِه تْزيحْ

يِرْجَع عَ حيفا وْتَحْت ( مار الياس )

يْغُزّ كُوعْ بْجَنْب صَخْرَه وْيستريحْ !!

*** وْظَلّ اللويسي عَ هَالرَّشِّه سْنينْ

حتى لَمِّنْها أجَتْ سيعتو وماتْ

-
-

يتبع
-
-
-

-
الرجوع الى أعلى الصفحة اذهب الى الأسفل
https://abosamer1953.yoo7.com
صابر عباهره
المدير العام
المدير العام
صابر عباهره


ذكر عدد الرسائل : 2011
الموقع : منتدى شهداء اليامون .. وكل فلسطين ..شهداء الحق من اجل الحريه
المزاج : صافي وذلك الفضل من الله
تاريخ التسجيل : 26/10/2008

الشيخ الويسي  ( اللويسي ) /  صابر عباهره ابو سامر / اليامون Empty
مُساهمةموضوع: رد: الشيخ الويسي ( اللويسي ) / صابر عباهره ابو سامر / اليامون   الشيخ الويسي  ( اللويسي ) /  صابر عباهره ابو سامر / اليامون Emptyالأحد فبراير 08, 2009 8:45 am

الناسْ عنّو شُو حَكُوا حْكاياتْ ! قالوا : الملايْكِه حِمْلَتُو ، وبِْمَيِّ من (عين اليمامِه) غَسْلَتو وْصَلَّتْ عليه ، وْدَفْنَتو بِمْغارَه جَنْبِ(الدّالْيِه) بْوادي فَلاحْ وِهْناكْ في جِنِيِّه كانتْ تُحُرْسُو وْتِطْلي حْجارِةْ قَبْرو بِالحِنَّا وْتُقْعُد تْوَلِّع نارْ تايْطُلّ الصّباحْ واللي حَبُّوه لو بِعِرْفُوا وين اندفنْ كانْ عِمْلوا من القبِر قُبِّه وْمَزارْ وْسَيَّجُوه بالياسمينْ دايِرْ مَدَارْ *** لكنِ النّاسْ لما حَدَا عِنّا بِموتْ والبَلَدْ كُلاّ بْتِعْرَفُو بِصِيروا من بِعْد العَزَا يِتْخَرَّفُوا وْكُل شِي عَنّو يِنِبْشُوا ، وْشُو ما بَدْهِنْ يُلُقْشُوا . *** في شَخْصْ قالْ بعد العَزَا بْأسبوعْ: إنّو اللويسي كانْ

في بيت ( سُرْسُكْ ) يِشْتْغِلْ تَوَّانْ ،

وْهُو يْقُشّ الشّوك والبِلاّنْ

تايْطَعْمِي التُّوْنْ

جَنْبِ ( الدَّحِي ) من وَرَا (العَفُّوْلِـه)

عِشْقَتُو غُوْلِه ،

وْليلاتي كانَتْ تيجي تِغْتِصْبو

وْمن يومْها صاب البعيد جْنونْ

***

وْشخص ثاني قالْ :

إنّو اللويسي في شَبَابو

كانْ طالبْ أزْهَري

وْمن كُثُر ما أبوه كان مْسَرِسْبُو

خوف ما يجبشِ الشهادِه جَنَّنُو

وْعَيَّدُو صَفُّو ثلاثْ مَرّاتْ

وْكانْ هَالمسكينْ

يْظَلُّوا قاعِدْ في الدَّرِسْ صافِنْ حزينْ

*** وْشخص ثالثْ قالْ :

إنّو اللويسي كانْ وَحْداني وْثَرِي

وِرِثْ عن إمّو وأبوه تَنْكَةْ ذَهَبْ

وقبل ما عَ (السَّفَرْبَرْلِكْ) ينِْطَلَبْ

شَمَّعِ الخيط ووينْ دَرْبُو عامَصِرْ ،

وِهْناكْ عاشْ بْشَقَّه مفروشِه بْقَصِرْ ،

وْحَلّ شَعْرُو ودارْ عاهَزِّ الخَصِرْ

عندْ (فَتُّوحَا وْبَدُّوعَا )

من غْياب الشّمسْ لَطْلوعَا ،

وْوَدَّرْ شَبَابو بينْ كاسْ وْبين طاسْ

وِالمصاري عَالعَوالِمْ وِالِقْمارْ .

***

وشخْص رابعْ قالْ :

إللويسي شْو ثَرِي؟ وْشو مِشْ ثري ؟!

ناقِصْنا بَسّ تِعْمَلُوا مِنُّو عبقري !

إللويسي كان واحدْ سَرْسَرِي

دَجَّالْ نُمْرَه واحَد وْمحتالْ

داير هْناك وْهون ووين ْ ماكانْ

يِفْتَح البَخْت وْيِقْرَا في الفنجانْ

يُكْتُبْ حُجُبْ من هَالكُتُبْ

يُضْرُبْ وَدَعْ يِعْمَلْ بِدَعْ

وْعَالِبْيوتْ يْفُوتْ

يِضْحَكْ بِفَتْح القهوِه عَ النِّسْوانْ .

***

وْشخصْ خامسْ قالْ :

مجنونْ يِحْكي وْيِسْمَعو العُقّالْ

اللويسي هاذْ كانْ مَنْجُوسْ

غريبْ مشْ معروفْ من أيّا بَلَدْ

واقفْ بِكُلّ لحظَه لكلّ واحَدْ رَصَد

وْعا شِكِل نَسْناسْ

في القهاوي يْنِسّ بين الناسْ

وِبْدون أيّا مْبالغَه

كانْ يِعْرِفْ طْنَعْشَرْ لُغَه

واللي عِرْفُوهْ حِلْفُوا يمين وْعَظَّمُوهْ

في الثورَه كانْ للإنجليزْ جاسوسْ !

*** وشخص سادس قال :

اللويسي شو جَسُوس وْمِشّ جَسُوسْ ؟!

وْبِعْرِف طْنعشر قَمُوسْ

وْبِحْكي مِثْل الببّغا طنعشرْ لُغَه

إللويسي كانْ واحدْ طَلْطَميسْ

طَبِلْ

ما بِعْرِف الجُمْعهْ من الخميسْ

وِالناسْ يَلْلي بِعْرَفوه بْحقّ وْحقيقْ

قالوا عَنّو مُجرم وْقاطع طريقْ

شارِدْ منِ جْبال الخليلْ

وِبْرَقْبَتو طنعشرْ قتيلْ

وِانْحَكَمْ بالإعدامْ لكنّو

استأنَفْ لَخَمْس مْأبّداتْ

وْبَعِدْها لمّا بْسِجِنْ عكّا انْحَبَسْ

حَسَّنْ سلوكو وصار صاحِبْ للحَرَسْ

وبعد مُدّةْ شِيْ سَنِه

بَرْطَل بْليرِةْ ذَهَبْ

زابِطْ إنِجْليزي وْهَرَبْ

بِسيّارِةْ جيشْ

تاوِصِلْ (حُرْفيشْ)

من أرض الجليلْ وِتْخَبّا سَبْع سْنين في (وادي الحبيسْ)

هيكِ بْكَسِمْ قَطْرُوزْ

عندْ ناس دْرُوزْ

وْعيلْتُو عَنْ جَدّ

شَيَّعَتْ إنّو ماتْ ..

واللي بِمُوت عِنّا بِرُوح وْبِنْتَسَى

وْما بِظَلِّشْ غير لإمّو الأسَى

وْلمّا طِلِعْ للناسْ من مَخْباهْ

وْشَرَّفْ عَ حيفا ما حَدَا تْلقّاهْ

وْفاتْ شِكْل المِسْتْحي

مْرَهْدِل بْحالو وْمِلْتْحي

وِالناسْ قالوا مْنينْ هَالإنسان؟!

كِنُّو مَقْطوعْ مالُو حَدَا وْغلبانْ . *** لكنْ الحَجِّه (حَمْدِه) من (دُوْرا) الخليل

قالتْ : حَرامْ يا ناسْ !

هيكي بْتُظُلْموهْ ،

شو هَالحكي يَلْلي عليهْ بِتْحَيّكُوهْ

والمَثَلْ ما خَلّى إشيْ إلاّ وْقالْ

مين أعْلَمْ بِيْكْ وبِخْبارَكْ

غير ربَّك وْجارَكْ ؟!

وإن كانْ بَدْكُو لَلصَّحيحْ

إللويسي كانْ شَبّ مْليحْ

وْآدمي وْطَـيُّوبْ

وْإبِنْ ناس مْلاحْ عال العالْ

لكنِ الناسْ ما دامْ فيها عْيُوبْ

عيبِ اللويسي إنّو كانْ بَطّالْ

قاعِدْ ، وَلا شَغْلِه وَلا عَمْلِه

وْدومْ دايرْ عَ النَّوَرْ.

وْمشْ عَجَبْ ،.

يِشْحَدْ خُبِزْ لولادْهِنْ ،

يُسْرُق لهِْنْ من حَطَبْ إمّو حَطَبْ

يِرْعَى حميرهِنْ ، يوقدلْهُنْ نارْ

يُنْفُخْ على كُوْرْ الفحِمْ ،

يُضْرُبْ على السَّدّانْ

وِيْدِسّ حالُو بين هَالنِّسْوانْ

تالعِشِقْ زَتُّو بْحُضُنْ نُوْرِيِّه

تْقُولوا عَنْها شَمسْ مَضْوِيِّه

لا بْليل بْتِخْفََى أو بِنْهارْ .

وْهَالنُّورِيِّه قَدّ مافيها حَلا

إنْ شافْها القاضي تَرَى عاف ِالصَّلا

وقال : لاحولَ ولا ..

وِبْتِعِرْفوا إنّو العِشِقْ

وينْ صاحْبو بِرُوحْ ،

مثل العِطِرْ بِفُوح

بِظْهَرْ على العاشق وْما بِخْفَى

وْلو لِبِسْ طاقيِّة الإخْفَا

وْياجماعْةِ الخير!

أحسنْ لَفُوْتْكو بالحَكِي

لَمِّنْ ما أهْل البِنْتْ دِرْيُوا بالخَبَرْ

عن المتعوسِه بْنَيِّتْهِنْ ،

قامُوا عَ السُّكّيتْ

تْلَمْلَمُوا وْفاتُوا على شيخ النَّوَرْ

حِكْيُوا حْكايِتْهِنْ

عن بْنَيِّتْهِنْ ،

وْقبَِل ما يِشْرَبُوا قَهْوِتْهنْ

الشّيخْ فَكَّرْ فيها وِتْنَحْنَح وْقالْ :

" تَرَى يا الرَّبِعْ شُوْفُوا

صَحِّ العَرِضْ مِثْل ِ الأرِضْ غالي

لكنِ الرّوحْ أغْلَى

وْهَالشَّبّ يِمْكِنْ حَبّ واسْتَحْلى

وْما دامْ إنْكُو مزعوجينْ

وْعاشَرَفْكو خايْفينْ ،

وِالخَطَأ ما فيش عاقِلْ بِقْبَلُو

وْإنتو جماعَه بْتِعِقْلوا

بَشُوفْ هَدِّ العَتْبِه مش مقبولْ

وْقَطِعْ راس البنت مش معقولْ .

بْرايي إنْكو تْرُوحُوا طَوَّالي

لأبُو الشَّبّ وْتِشْرحُوا الحالِه

إنْ قِبِلْ يحكي في البِنِتْ لابْنُو

هَيُّو قِبِلْ وِانْ ما قِبِلْ

بْتُرُبْطُوا بالدّرْبْ لهَاَلشَّبّ

وِبْتِمِسْكُوهْ وِبْتضربوه كَفّين

بَلْكي بِتْرَبّى ،

بَسّ دِيْروا بالْكو !

لَتِـيْجي هَيِّه قاضْيِه ،

وْنِبْتلي بْدَمُّو ..

وْبالفِعِلْ راحُوا لَبُوه ،

لكنِ الزَلَمِه انْتَحَسْ ،

كيفْ تا يْناسِبْ نَوَرْ ؟!

مع إنّو ياما فيه نَوَرْ بِشَرّفوا كُلّ البَشَرْ .

وِبْليلِه ما بِتْشُوفْ فيها إصْبَعَكْ

راحوا وْفاتُوا على الشّبّ سَبْعَهْ

أطْعَمُوهْ قَتْلِهْ أكْلِه عاشَبْعَهْ ،

وْبعد هَالقُصَّهْ

إللويسى صابَتُو غَصَّهْ

وْمثلْ هَالهُبْلانْ ،

مع إنُّو كانْ عَيُّوق وِحْليوَى ،

يا ألِفْ حَسْرَه عاشبابو الزّين ْ

عاش وقضَّى العُمُرْ عَزّابي

وْحَرَّمْ ع َحالو الجيزِه والنِّسوانْ .

*** وِالناسْ ياما من بَعِدْها خَرَّفُوا

إنّو اللويسي في بَعِضْ مرّاتْ

كانت تْصِيبو من العِشِق نوباتْ

وِيْصير هيكي يْكِزّ ع َسْنانو

وْمِثْلِ الجَمَلْ يُسْرُكْ على نْيابو

وِيْعُضّ عا إصْبَعو تايْدَمِّيهْ

وْمن زودْ قَهْروا يْشَلِّخ ثْيابو

وْيِصْرَخ الصّوت ، وْيِرْتمي غَمْيانْ .

وْلما كان يْفيقْ

يْصيرْ يِتْشَهْنَف ويستغفرْ

وْحالْتو حالِه

وِدْموعو عَ الخدّين سَيَّالِه .

*** وْمرّات في الخلواتْ

لما يرقّ الليلْ

وِيْشِعّ بالعَتْماتْ نِجْم سْهيلْ

كانْ يوخذ الكاساتْ

في خيمتو بْصَفْحِةِ (الحَلِّيصَا)

وِيْصير هيك يْدُقّ وِيْغَنيّ

ألله مـا شافُـوه لكن أنا شُفْتُـو

ألله ما عِرْفُـوه لكنْ أنا عْرِفْتُـو وِالقمرْ بِطْلَعْ وِالشّمِسْ بِتْغيبْ

كُرمال عينـيِّي وْعينين الحبيبْ

ألله يعيـنْ ألله والحبّ ماشا الله

يالله يارحمـانْ فَـرِّجْ كَرْبِـتي

وِبْجاهْ نبيَّ الله هَـوِّن غُرْبِـتي

******* لو كْنِتْ عيّانْ وِالليل غاشـي

لاجيلِكْ حَفْيانْ وْحامـل فْراشي

لاجيلِكْ في البَرْدْ من زود وْلوعي

واطفِّي في الشَّرْدْ ناري بِدْمـوعي

لاطْرُقْ عابابِكْ تا تِفْتَحِـي لي

وابوس عْتابِكْ لو تِسْمحي لي

إن فَـوَّتْينـي بِتزول هْمومي

وان كَرَتِّينـي لاشـقِّ هْدومي

وادور بِالِبْلاد مْرَهْـدِلِ بْحالي

وَاشحدْ عطفِ الناسْ

طـــول الليـالي

ألله ما شافوه لكن أنا شُفْتو

ألله ما عِرْفوه لكن أنا عْرِفْتو

والقمرْ بِطْلَعْ وِالشَّمِسْ بِتْغيبْ

كُرْمال عينيّي وعينين الحبيـبْ

يا حبيب ياحبيب يارســول الله

إشْفَقْ عاغريبْ سايِـحْ بِحُبّ الله
-
-
-
-
-
يتبع
الشيخ الويسي ( اللويسي )
-
-

-
-
-
صابر عباهره / اليامون
-
-
-
-
-
الرجوع الى أعلى الصفحة اذهب الى الأسفل
https://abosamer1953.yoo7.com
صابر عباهره
المدير العام
المدير العام
صابر عباهره


ذكر عدد الرسائل : 2011
الموقع : منتدى شهداء اليامون .. وكل فلسطين ..شهداء الحق من اجل الحريه
المزاج : صافي وذلك الفضل من الله
تاريخ التسجيل : 26/10/2008

الشيخ الويسي  ( اللويسي ) /  صابر عباهره ابو سامر / اليامون Empty
مُساهمةموضوع: رد: الشيخ الويسي ( اللويسي ) / صابر عباهره ابو سامر / اليامون   الشيخ الويسي  ( اللويسي ) /  صابر عباهره ابو سامر / اليامون Emptyالأحد فبراير 08, 2009 8:52 am

***

وبَعْد هاذا والذي

لمّا سِتّي (زْليخا) قُلْتِلْها

إنّو اللويسي كانْ هيك وْهيكْ

وِالنّاس ما خَلُّوا ولا بَقُّوا

وْكل شي عنّو بعرفوه بَقُّوا

قالتْ يا عيب الشّومْ !

دستور من خاطْرو ،

سِيْدي اللويسي كان وَلي وْمبروكْ

وِاللي حَكُوا لَكْ غيرْ شِكِلْ غَشُّوكْ

صَحّ اللويسي كانْ عَ بابَ الله

لكنّو كانْ زَلَمِه يْخاف الله

مشّ مِثِلْ ما بْتِعْرِف زْلام اليومْ

الحبّابين لِفْلوسْ ،

وْلا دين ولا ذِمِه وْلا نامُوسْ .

يا حسرتي قدّيش كانْ حَسّاسْ

وْكانْ يِتْألّمْ لَوَضْع النّاسْ .

*** وْلمّا سِتيّ عَ اللويسي تْحَسّّرِتْ

خِفْتْ فِعَلاً من كُثُرْ ما تْأثّرَتْ

إنّو يوخُذْها الحالْ

قُمْت وهَزّيت كْتافْها

وْهي مْكَشّرِه وْهيكي تْزِمّ شْفافْها

وْقُلْتْ : شُوفي اللويسي كانْ رِجّالْ

قالَت : مْثالو في الرّجال قْلالْ .

*** وْبَعِدْ هَدْوِه زْغيرِه قالتْلي

شُوفْ يا بْنَيِّي !

بَعِدْني لليومْ بَتْذَكَّر

أوّل ما جابوا عَ الِبْلاد الراديات ،

سِيْدي اللويسي كان

عَ القهاوي يْفوت

ويِْشوف كيف النّاس

مْحوبنين مثل الغَنَمْ وِمْرَتّعين

يْدَخّنوا أرجِيْلِه ،

وْيِشْرَبوا باردْ وقهوه وشاي

وْيقعدوا يْطُقّوا حَنَكْ ،

وِيْجادْلوا عَ الكتفْ بُوْقَفْ كَمْ مَلَكْ ؟!

والقهوِه مثل المِضْبَعَه

وْمِثْل الطَّبُون مْعَسِقْدِه

وْسودا مثل المِشْحَرَه

وْيِحْكوا حكايا مْشَقِبْعَه

وْطاولات الزَّهِرْ منصوبِه

وِالخايْرِه في الكاس مصبوبِه

وِالشَّدِّه طالْعَه نازْلِه طُوْل النَّهارْ

قصّ وديكَه وْرِيَّه وِسْباتي

والحَرْب في العَلَمينْ

وإحنا بحال البينْ

طوشاتْ في الحاراتْ

بالعُصِيْ وِالبلطاتْ

وِالصبايا وِالشباب مْتَهْتَهينْ

إلشمال من اليمين مشّ عارْفينْ

والرّادْيات تْدُقّ وِتْغَنِّي:

" خَلِّيها على الله على الله

وْمِشّيها وْيَلآّ ؤيلاّ "

وْقَدّيش تُرْطُنْ باللغاتْ

وِتْبُخّ سَمَّ الهاري في النّشْراتْ

سيعتها سِيْدي اللويسي كان يْثورْ

لمّا يِسْمَعْ نشرِة الأخبارْ

وْيِشْتعِلْ جِسْمو مِثِل تَنُّورْ

وِتْقادِح عْيونو شَرارْ

وْعا شِكِلْ مَكُّوكْ

تْشوفو رايَحْ جايْ في شارْع الملوكْ

وِيْصيح بين الناسْ :

" جُوْكُمْ خَذُوْكُمْ من بْلادْ بَرّا

مْن البحِر وِالجَوّ

جَرَادْ ،

وِيْعَتِّمْ عليكو الضَّوّ

وْجوه بُرْص وْبِيضْ

وِالخَبَر مكتوب بِالبُنْط العريضْ " .

*** وْعَا الجوامع لمّا كان يْفُرّ

يْطُلّ راسُو من البابْ وِيْصيحْ:

"يا مْبَنَّجين وْنايْمين فِيْقُوا !

إصْحُوا بِكَفِّي نومْ

مِنْ سِنْةْ آنَسْتُ لَحَدِّ اليومْ

بُكْرَا بِتْضِيع بْلادْكُو

وْنِسْوانْكُو وِوْلادْكُو

بُكْرَا بصيروا بْإرْبِدْ شَحّادينْ

وِبْتِمْشُوا في الارض الغريبِه حافْيينْ " .

*** وْهونْ سِتّي زْليخا رَفْعَتْ صوتْها

وْدَقَّتْ عَصَاتْها بِِالوَطَاه وْقالتْ :

بَرْجَعْ بَقُوْل شُو قُلْتْ يا بْنيِّي

الشيخ اللويسي كانْ وَلي وْمبروكْ

أيْ بِكْفِي يا بْنيِّي

إنّو بَقَا مْفَتِّحْ ما بينْ عُمْيانْ

يا ريتْ سِمْعُو مِنُّو هَالطُّرْشانْ

سِيْدي اللويسي كانْ يِتْنَبَّا

وْما كانْ عَنُّو شيء يِتْخَبَّا

كانْ عارِف وْفَهْمانْ

وْكِلِمْتُو انْحَفْرَتْ على الصُّوّانْ

" بُكْرَا بِتْضِيع بْلادْكو

وْنِسْوانْكُو وِوْلادْكُو

بُكْرَا في إربد بِدُورُوا شَحّادينْ

وِبْتِمْشُوا في الأرض الغريبِه حافْيينْ " .

إللويسي ألله يِرْحَمُو

قَدّيشْ كانْ حَسّاسْ

وْكانْ يتِأْلّمْ لَوَضْع النّاسْ

وِالبَشَرْ شِهْدُوا

وِالَحَجَرْ بِشْهَدْ

شايِنْ حَكاه سِيدي اللويسي صارْ

شايِنْ حَكاه

سِيدي اللويسي

صَارْ !!

ــــــــ مفردات وأعلام : الشيخ اللويسي : اسمه محمد ولقبه اللويسي قضى معظم حياته في حيفا ، على الشاطىء فوق بابور القطن ، وكان كاشفًا يعرف السارقين ، ويمنعهم من مهمّاتهم ، كشف عن أفعى في قدر لبن ، كانت إحدى اللبنات تحمله ، قيل دُفن في قرية اليامون بقرب جنين ، ويُقال أيضًا في جبل الكرمل ، كما له ضريح مشهَّر في صفّورية . ببّورالقطن : مكان في مينا حيفا . السّعادة : منطقة شرقي حيفا ( جسر الشِّل ) . العزيزيّة : منطقة في حيفا غرباً ، نسبة إلى عزيز الخيّاط أحد أعيان حيفا وأثريائها . عمود فيصل : نصب أُقيم لذكرى الملك فيصل الأوّل ، يوم مرّ جثمانه بحيفا . الجرينة وساحة الحناطير : مكانان من الامكنة المعروفة في حيفا . يلعن أبو اللي يحكي وأبو اللي ما يحكي : قول مأثور عن الشيخ اللويسي أي : لُعِنَ ابو الذي إذا حكي لا يحكي الحق ، وكذلك لعن أبو الذي يعرف الحق ويسكت عن قوله يكاشف : يكشف المخبّأ ويعرف بالغيب . يتباصر : يصيب من يؤذيه بمكروه وذلك لكرامته عند ربّه . خاطمة : مارّة . لاشور ولا دستور : بدون استئذان . تُفاعي : تُظهر سوء خُلقها الأفعواني . جُغْمة ميّ : شربة ماء . نده : نادى. الرِّفاعي : الشيخ أحمد الرفاعي متصوّف وذو طريقة تُعرف باسمه " الرفاعيّة " ، وقد قيل عن كرامته : "من يشرب على كيس الرفاعي لا يؤذيه سُمّ الأفاعي " . داشع دوز : هاجم دغري .سعدى : من أسماء الحيّات .أبو جعدة : كنية الذئب . غمّارة : قطعة من حبل بطول مترين تقريبًا تستعمل لحزم أغمار القمح الحصيد أو الشعير . راحوا فَلِيْخَا : هربوا . الكبابير : قرية في كرمل حيفا تسكنها الجماعة الإسلاميّة الأحمديّة . هادس : هاجس نداء خفي . يا حيف : يا عيب . أيش سوّت : ماذا عملت .اليمون ( اليامون ) : قرية إلى الغرب من مدينة جنين . بحذا : بجانب . طرحة خبز : مقدار أربعة أرغفة أو مايتسع له الطابون . . الدّمون ( الدامون ) قرية من قضاء عكّا قريبة من شفاعمرو هُدمت وشُرد أهلها عام 48. دوز دُغْرِى : على خطّ مستقيم . الخمّارات : شارع الخمّارات في حيفا . جبرا : أشهرخيّاط في حيفا زمن الانتداب البريطاني على فلسطين . شنتة : فستان ، ثوب طويل . شنتة : حقيبة . مار إلياس : مقام الخضر عليه السلام في حيفا . يغزّ كوع : يضطجع مستندًا إلى ساعده . عا هالرشّة : على هذا المنوال أو المعدّل . عين اليمامة : نبعة ماء في جبل الكرمل . وادي فلاح : من أودية جبل الكرمل يتجه إلى البحر غربًا . يلقشوا : يتحدّثون . بيت سُرْسُك ( سُرْسُق ) : عائلة سُرْسُك ، وهي عائلة إقطاعية لبنانية كانت تمتلك معظم مرج ابن عامر ( نصف مليون دونم ) باعت عام 1872 صفقة أولى من الأرض للوكالة اليهودية ، ثم أتبعت البقية بين 1921ـ 1927 بسعر زهيد ثمانين قرشاً للدونم الواحد . وكان على تلك الأرض اثنتان وعشرون قرية عربية لفلاّحين ومزارعين يعدّون تسعة آلاف نسمة شُرّدوا عن وطنهم عام 48. يطعمي التون : يلقي فيه الشوك ونبات البلاّن ( النّتش )ليبقى مشتعلاً فتنضج حجارته وتصبح جيرًا حيّاً . الدحيّ : جبل الدحيّ وعليه قرية الدحيّ فوق مدينة العَفُّولة ، مشرف على مرج ابن عامر مسرسبو : مذهب عقله . السفر برلك : كلمة تركيّة يُقصد بها التعبئة العسكريّة التي دُعي إليها إبناء برّ الشام ليحاربوا في الجيش التركي في بداية الحرب العالميّة الاولى عام 1914. فتحيّة : المطربة فتحيّة أحمد ، وكانت ذات شُهرة قبل أمّ كلثوم . بدّوعة ( بدعدع ) : إسم الدلع للراقصة والمغنيّة الإستعراضيّة اللبنانيّة الشهيرة بديعة مصابني . سرسري : لصّ ، سرّاق . ودّر : صرف سُدى . مصاريه : نقوده . الثورة : ثورة 36 في فلسطين . طلطميس : أمّي ، مغلق التفكير لا يعرف شيئاَ . حرفيش : قرية درزيّة قرب الحدود اللبنانية . وادي الحبيس : وادٍ قرب قرية حُرفيش في شمال الجليل جنوبي النبي سبلان . بْكَسِم قطروز : بشكل قطروز وهو من يخدم لقاء طعامه وكسوته وحذوته وأجر زهيد يأخذه من الغلّة في آخر الموسم. . مرهدل بحالو : مهمل زيّه بملابس رثّة . دورا : بلدة من أعمال مدينة الخليل . طاقية الإخفا : طاقية سحريّة من يلبسها يختفي ، يرى الناس ولا يرونه . يتشهنف : يشهق من البكاء . الحَلِّيصا : حيّ من أحياء حيفا تسكنه عامّة الناس وفقراؤهم . عَيّان : مريض . يوخذها الحال : تأخذها نشوة صوفيّة ( تُدروِِش ) . محوبْنين : متكوّمين أكوامًا . مْعَسِقْدِة : متلبِّدة بالدخّان . المِشحرة : المحرقة التي يصنع فيها الفحم . العَلَمين : في صحراء مصر الغربيّة وكانت مسرحًا لمعركة طاحنة بين الجيوش الألمانية بقيادة رومل والإنجليزيّة بقيادة منتغومري في الحرب العالميّة الثانية سنة 1942 إندحر فيها الجيش الألماني . تنّور : حفرة في التراب أو الصخر مجصّصة بطين صلصالي تُحمى بنار الحطب ويُخبز فيها ، وخبز التنّور والصاج والطابون هو الخبز الشهي والمفضّل لدى الفلسطيني . ألم تقل اغنية ناظم الغزالي : من ورا التنّور تناوشني الرغيف يارغيف الحلو يكفيني سنة شارع الملوك : من أشهر شوارع حيفا . من سنة آنست : منذ أن قيلت الآية " إنّي آنست نارًا " كناية عن قديم الزمان . الوطاه : الأرض شاين : كلّ شيء

-

-
احضرتها لكم هنا لمنتدى صابر عباهره
لكي يقرأ الناس الذين سمعو عن الويسي
وهن اخباره بهذه الخاطره
حيث ان الويسي له عندنا باليامون سمعه واسعة الانتشار
لدرجة ان الناس تخاف ان تسبه او تشتمه
وهناك حتى الان اناس تتبرك به او تحلف به
وهذا حرام اصلا ..
اللا انه بسبب ان الويسي كان يتردد بين اليامون وحيفا
وبسرعه منقطعة النظير
بقيت سيرته على الالسن رغم وفاته من زمن بعيد .
-
-
-
صابر عباهره ../ اليامون
*
*
*
*
*
*
الرجوع الى أعلى الصفحة اذهب الى الأسفل
https://abosamer1953.yoo7.com
 
الشيخ الويسي ( اللويسي ) / صابر عباهره ابو سامر / اليامون
الرجوع الى أعلى الصفحة 
صفحة 1 من اصل 1
 مواضيع مماثلة
-
» من أجمل ما قيل عن فلسطين / صابر عباهره ..ابو سامر. / اليامون
» صابر عباهره..ابو سامر / يرثي شهداء مذبحة اليامون
» كم اشتاق يا وطني ..من اغاني الثوره ...صابر عباهره / ابو سامر...اليامون
» ملطوش منقول مسروق / بقلم صابر عباهره ..ابو سامر ...اليامون
» انتخابات البلديات في فلسطين ...بقلم / صابر الحاج محمود عباهره ...ابو سامر.. اليامون

صلاحيات هذا المنتدى:لاتستطيع الرد على المواضيع في هذا المنتدى
منتدى بسمة أمل فلسطين :: الشعر والادب والخواطر :: الامثال الشعبية والحكم-
انتقل الى: