جلسه على قصة البيت:
ولك يا مسخمطه انتِ شفتِ اللي أنا شفته
شو اللي شفتيه يا مرمله؟
ولك دار ابو عادل بنو اوضيتين وعليي وبلكونه وبدهم يجوزو ابنهم كل هذا بسنه وحده !! فكرك من وين جابو هالمصاري..؟
أنا عارفه يا أختي .!!
انا بقول لما كانو يهدو بقنطرة ببيتهم العتيق لقيو مغطاس مليان ذهب .؟
وأنت السادقه شو مغطاس الظاهر لقيو بقلوله .!!
أجت عليهن أم مسعود ..!!
عن شو بتحكين يا مشحرات وحاطات روسكن بروس بعض..؟؟
بس بحياة رحمة امك لا تقولي لحدى ولا تجيبي سيره..!
شوقتيني يا امات البلايش؟
انتِ مش شايفه دار ابو عادل هالدار اللي بنوها وهظاهم بدهم يجوزو ابنهم
قالت الله يعطيهم ويتمم على خير دار ابو عادل بستاهلو كل خير عقبال عند اولادنا وولادشن
قالن آمين بس مش هيك القصه
الناس بقولو لقيو بقنطرة بيتهم بقلولة ذهب .!
صمتت ام مسعود كالمصدومه .. بقلوله..ذهب..؟؟
الله لا يباركلهم فيهن الحرميه قطاع الطرق ..!! وأنا بقول مالهم اختفو وبطلو يبينو وطول الليل والنهار بدكدكووو..؟!!
ولك ليش يا أم مسعود هالدعاوي يا مشحره عَ ساعة هالصبح .؟؟
قالت: واللا ما بيتهم هذا اللي هدوه كان لسيدي ابو العبد وضحكو عليه واشتتروه منو قبل ما يموت.
قالن والمعنى يا أم مسعود ؟؟
قالت هذول الذهبات كانت ستي سعده الله يرحمها مخبيتهن بالقنطره لأيام الشدايد
ضربن كلهن خدودهن ولطمن عليها وقالن لأم مسعود والله لازم تتشكو عليهم وتطالبوهم بجرة الذهب اللي لقيوها لانكم انتو اولى منهم .
وبعد اشوي انقطعت السيره لانهن سمعن صوت الحاج علي جاي بكحكح وبدق الطريق بباكورته
قامت النسوان اتفرطعت والله اعلم بكرا كم راح يكونو الذهبات .
.
مغطاس..بقلوله...جره ..زير...بطه.
.
نصيه ..تنكه.. قفه..مشتبل.
.
مع تحياتي
.
ابو سامر
.
.
موضوع: قصص من بلدي..احاديث نسوان على قصة اليبت